Lestariang Basa Bali, Beritabali.com Nyayagayang Kanal “Isin Gumi”

guest@beritabali.com

Beritabali ID: —

Langganan

Beritabali Premium Aktif

Nikmati akses penuh ke semua artikel dengan Beritabali Premium

Lihat Benefit Lainnya

Lestariang Basa Bali, Beritabali.com Nyayagayang Kanal “Isin Gumi”

Kamis, 6 Februari 2025, 23:14 WITA Follow

beritabali/ist/Desain latar menggunakan AI. Desain karikatur hasil karya seniman kartun. (Jon Katos)

BERITABALI.COM, DENPASAR.

Pinaka media online kapertama ring Pulau Bali, Beritabali.com state ngutsahayang inovasi. Sane pinih anyar, Beritabali.com pacang ngembasang kanal berita mabasa Bali utawi gatra Bali, Isin Gumi.

Kanal berita mabasa Bali “Isin Gumi” puniki ngawit kaembasang ring 25 November 2016. Ring pungkur wekas kanal Isin Gumi puniki pacang kadagingin gatra-gatra naler artikel mabasa Bali.

Pamucuk redaksi Beritabali.com, Putra Setiawan maosang, kanal Isin gumi marupa pidabdab saking Beritabali.com ngalestariang Basa Bali.

“Sekadi sane kauningin sareng sami, para alit-alite miwah yowanane mangkin sampun makehan ngawigunayang basa indonesia ring pabligbagan sarahina-rahina, inggian punika ring jero, gria, kakubon, naler ring sekolah. Basa Bali sampun arang kawigunayang. Malarapan antuk kawentenan kanal Isin Gumi puniki, titiang mapangapti pratisentana jagat sayan nresnain basa Bali miwah state ngalestariang” baos dane.

Gumi Bali sepatutne upapira melahang, yen lakar ngupapira “gumi” Baline, patut malu urati teken ape ane nasarin “gumi” Baline. Ade bek pesan anake ane ngorahang, “gumi” Bali sida urip sangkaning taksu jagat Bali, sakewala taen ke iraga matakon, ape ane ngawinang taksu jagat Baline urip tur sida nguripin?. Ento ane makada, patut malu inget-ingetang buin, apa mirib ane sida nguripang Bali.

Yen pineh-pinehang, satondene uripe majalan kanti ked jani, ipidan anake lingsir suba ngardi tetamian. Ento ane sida kasengguh “jati angga” iraga dadi nak Bali. Apa dogen luirne?, ade ane madan Basa, Sastra miwah Aksara Bali.

Tetelu ne ane dadi dasar simalu jadmane nyalanin karmane di mercapada, bilih-bilih lantas di gumi Baline. Sangkaning Basa iraga sida nawang, sangkaning basa iraga sida weruh teken ane madan isin-isin sastra ane luih, suba lantas keto apang sida kawarisin salantang masa, ento lantas ane suratang nganggon aksara ana mautama.

Lautang buin oratne, yen saihang di aab jagate ane jani, kenken mirib kawentenan basa, sastra miwah aksara Baline?, suba ke iraga maka pratisentana jagat Bali eling ngawerdiang tetamiane ento?

Yen jani di zaman globalisasi buka kene, iraga engsap teken swadharma ngupapira tetamian leluhure nguni, lakaran tusing ngidaang narka suba kenken pakibeh jagate limang tiban ane lakar teka. Enu ke mirib jagat Baline sida dadi pulo surga? buka tourise ngorahang “Bali is the paradise island”

Jani, de buin ngantiang kene keto, pidabdabe ene nak patut kakawitin, eda tuah orataange dogen. Yen jani Jon Katos suba inget, timpal-timpal buin pidan lakar inget?, Buka panikan Ida Padanda Made Sidemen, Tong Ngelah Karang, Karang Awake Tandurin. Jalan jani matatanduran, tandurin karange ben kaweruhan tur kaluihan daging-daging sastra, ane kacihnayang ban basa, tur kasuratang ban aksara. Apang buin mani, isin gumine tusing ja usak. Lan jani isinin buin gumine ban kaluihan.